اداریہ

از: ذاکرحسین ثاقب

علامہ مجاہد  شیخ عیسیٰ قاسم

"فلا تهنوا ولا تحزنوا وأنتم الأعلون"

آپ اداس اورناامید نہ ہوں چونکہ اللہ تعالیٰ کے نزدیک آپ کامرتبہ بلندہے۔

آیت اللہ  شیخ عیسیٰ قاسم بحرین  کے نامور اور ممتاز علماء اور سیاسی قائدین میں سے ہیں۔ آپ بحرین کے دارالحکومت منامہ کے نزدیک ایک چھوٹے سے گاؤں "دراز" میں متولد ہوئے اور اپنی ابتدائی تعلیم وہاں ہی مکمل کی۔

دینی تعلیم ۱۹۶۰ء کی دہائی میں بحرین میں ہی شیخ "علوی الغرفی" کے حضور شروع کی اور پھر نجف اشرف تشریف لے گئے جہاں دیگر علماء کے علاوہ مرجع تقلید شہیدسید محمد باقر الصدر کے شاگر رہیں۔

۱۹۹۰ء کی دہائی میں اعلیٰ مذہبی تعلیم کی تکمیل کی خاطر شہر مقدس قم تشریف لے گئے جہاں انھوں نے حصول تعلیم کا سلسلہ جاری رکھتے ہوئے مرحوم آیت اللہ العظمی فاضل لنکرانی، آیت اللہ العظمی سید محمود ھاشمی اور آیت اللہ العظمی سید کاظم حائری سے فیض حاصل کیا۔۸ مارچ ۲۰۰۱ء تک قم میں رہائش پذیر رہنے کے بعد ایک دفعہ پھر وطن پلٹ آئے جہاں آپ کا وسیع پیمانے پر پُرجوش اور شاندار استقبال ہوا۔ یہاں آنے کے بعد آپ نے لوگوں کی تعلیم و تربیت اور شیعہ عوام کو آلِ خلیفہ کے ظلم و ستم سے آگاہ کرنے اور بیدار کرنے کی غرض سے نماز جمعہ کی ذمہ داری سنبھالی۔

شیخ عیسیٰ احمد قاسم ایک  نامور عالم دین ہونے کیساتھ ساتھ سیاسی و سماجی کارکن بھی ہیں۔ بحرین کی آئین ساز اسمبلی کو منتخب کرنے سے قبل شیخ عیسیٰ قاسم نے عوام کے کہنے پر خود کو اسمبلی کا حصہ بنانے کیلئے نامزد ہوئے اور اس بھاگ دوڑ میں فتح یاب ہوئے۔اس اسمبلی میں آپ  نے اسلامی گروپ کیساتھ اتحاد کرلیا ۔آئین ساز اسمبلی کا حصہ بننے پر بحرین کی عوام کے حوصلے بلند ہوئے، کہا جاتا ہے کہ شیخ عیسیٰ قاسم اور دیگر مسلم علماء نے بحرینی آئین میں کئی اسلامی شقیں درج کروائیں ۔1971ء میں شیخ عیسیٰ قاسم نے خود کو قومی کونسل کیلئے پیش کیا اور اسکے رکن بن گئے۔ شیخ عیسیٰ قاسم بحرین کی عوامی حلقوں میں کافی اثر و رسوخ رکھتے ہیں اور بحرین کے مسلمانوں کی اکثریت انہیں اپناقائد مانتی ہے۔

20جون 2016ء کوبحرینی وزارت داخلہ نے شیخ عیسیٰ قاسم کی بحرینی شہریت منسوخ کردی ،اور اُن پر الزام عائد کیا کہ بحرین میں بغاوت برپا کرنے کے غرض سے انہوں نے متعدد جماعتیں تشکیل دیں۔ فی الوقت شیخ عیسیٰ قاسم کیخلاف بحرینی حکومت کارروائی کرنے کی خواہاں ہے اور اس سلسلے میں سکیورٹی فورسزنے شیخ عیسیٰ قاسم کے رہائش گاہ کومحاصرے میں لے رکھا ہے مگر بحرینی عوام شیخ عیسیٰ قاسم کی حمایت کرتے ہوئے ان کے گھر کے گرد جمع ہیں ۔

 شیخ عیسیٰ قاسم کیخلاف بحرینی حکومت نے فیصلہ کررکھا ہے کہ  آنے والے دنوں میں فیصلے کا حتمی اعلان متوقع ہے جسکی وجہ سے دنیا بھر کی نظر بحرین پر ہیں ۔

ہمارے ان مجاہدین پرلاکھوں سلام ہو۔  اللہ تعالیٰ   ان  کی کوششوں کو شرف قبولیت اورآپ کی محنتوں کا اجر عطاعظیم  فرمائیں۔ 

ہم آل سعود(آل نحوس) کی  حکومت سے بزرگ عالم دین آیت اللہ شیخ عیسی قاسم کی نظر بندی ختم اور دیگر سیاسی قیدیوں کی فی الفور  رہائی کا مطالبہ   کرتے ہیں۔     "إن تنصروا الله ينصركم ويثبت أقدامكم"